About us
ዕላማ ቤተ-ፈውሲ መርበብ ሓበሬታ፡ ንኤርትራውያን ንምግልጋልን ምዕጣቕን ዝተዳለወ ኣገልግሎት እዩ። ኣብ ህይወት ዝገጥመና ማህሰይቲ፡ መስበርቲ፡ ኣብ መንፈሳዊ፡ ኣእምሮኣዊ፡ ስምዒታዊ ጥዕናና ዘለዎ ኣሉታዊ ጽልዋ ክንርድኦ ብምግባር፡ መገዲ ሕውየት፡ ፈውሲ፡ ክንጎዓዝ ብምሕጋዝ፡ ዝተለወጠ ህይወት ንምንባር ዘኽእነና ትምህርቲ ንምምሃር እዩ። ቤተ-ፈውሲ፡ ካብ ሓቀኛ ተመክሮ፡ መስበርትን መከራን ዝመልኦ መገዲ፡ ካብኡ ሓሊፉውን ፈውሲ መንፈስ ቅዱስ ዘለዎ ተመክሮ ዝተወልደ ኣገልግሎት እዩ። ኣብ ህይወትና ዘለው ውሽጣዊ መስበርትን ኣቁሳልን ብግቡእ እንተዘይተኣልዮም፡ ብመስርሕ ሕውየት እንተዘይሓሊፎም፡ ካብ እግዚኣብሔር ከኣ ፈውሲ እንተዘይተቀቢልና፡ ኩሉ ክፋል ህይወትና፡ መንፈስና፡ ኣእምሮና፡ ቀልብና፡ ስምዒታናን ኣካልናን፡ ብኣሉታ ክጽለዉን ንህይወትና ከበላሽዎን ተኽእሎ ኣለዎ። ክንእመን፡ ክንክፈት፡ እግዚኣብሔር ውሽጥና ክፍውስ ብትብዓት እንተዘይ ኣፍቂድናሉ፡ ምስ ኣምላኽ ኰነ ምስ ኣብ ከባቢና ዘለው ሰባት ዝህልወና ርክብን ዝምድናን፥ ክበላሸወናን ክፈሽለናን ግድነት ይኸውን። ቤተ-ፈውሲ፡ ኩሉ ምንጪ ፍልጠታ መጽሓፍ ቅዱሳዊ ኰይኑ፡ ንሰብ ናብ ኣምላኽ መጺኡ ክፍወስን ክልወጥን፡ ዕረፍቲ፡ ሰላም፡ ህድኣት፡ በረኸት ንኽወርስ ናብ ኣምላኽ ንኽቀርብ ዝሕግዝን ኣነጺሩ ዘረድእን ኣገልግሎት እዩ።